CLICK HERE FOR THOUSANDS OF FREE BLOGGER TEMPLATES »

Saturday, February 28, 2009

ياللى نويت الجرح


ياللى نويت الجرح ... متلومش ع المجروح
لو يوم وجع دمعته علّى ف صراخه النوح
و لو نويت تدبح و رفعت سكينك
الدم لو لطخّك ... متلومش ع المدبوح
!! عجبى

Wednesday, October 22, 2008

لما الوجع بيزيد


لما الوجع بيزيد على قلبى بحتاجلك

لما السكون يسكن وجدانى بندهلك

أنا اه بعيش و بمثل الفرحة

لكن محستهاش بعدك ولا قبلك

Friday, September 5, 2008

حبيبى فى عيونك

تحديث
بعتذر عن عدم التواجد خلال شهر رمضان
لان وقتى مضغوط جدا
و دخولى على النت اكتر من محدود
اعود لكم بعده بإذن الله
تحياتى للجميع
.............................................................

ضمينى يا أشجار و انسينى فغصونك
قلبى لأوراقك عاشق و بيصونك
دمعى على خدك , دفاه يقيد الكون
علشان بشوف ديماً حبيبى فعيونك
.... وعجبى

Tuesday, August 26, 2008

يا بحر

يا بحر غنيلى و خد بإيد غربتى
و ارمينى فوق شطك , أصل الرمال صحبتى
دفينى بصخورك و امحى اوام وجعى
و بموجك العالى ارسم خطوط بسمتى
.. و عجبى

ياشمس

ياشمس ياللى أشعتك بتكوى جرح الكون
اكوى جراحى فسكتك خلى آلامى تهون
خدينى و ارمينى فى حضن يحمينى
وصى حبيبى يضمنى و أمّنيه ما يخون
,
.... و عجبى

Wednesday, July 16, 2008

جنون الغربة

تحديث
........
اعتذر عن تغيبى لفترة
اعود بعدها بإذن الله
و اعتذر لكل من اغفلت تعليقه و لم ادخل مدونته
.
.
فى الدنيا دى ماشيين على اطراف اصابعنا
ننده بعلو الصوت , جنون الغربة يسمعنا
يدور بينا بلاد و بلاد , ياخدنا فحضن اقوى بعاد
و لمّا خلاص نقول راجعين .... مفيش مركب ترجعنا

.... عجبى

Monday, July 14, 2008

الغدر بكانى


جريت من الأحزان و لقتها لحقانى
فاكرة الجراح لكن ... الفرحة سرقانى
جربت يوم اضحك و انسى اللى كان بيّا
القسوة قتلتنى و الغدر بكانى

عجبى


دواير


يا عمر تايه وسط صوت الموت
أنفاس ملامحك صوتها اعلى سكوت
الارض سارحة و النجوم حرّاس
و اليوم يعدى و السنين بتفوت
***
ده حلم داير بس مش قدك
مليان دواير حزن على خدك
جربت تلمس أوله و تبنيه
عرّاك أمام الكون و بجرئته هدّك
***
والخوف طريقك اللى مش معروف
ضرير و حالف عمره يوم ما يشوف
حملك تقيل نايم على ضهرك
و العمر يجرى بيك لأرض الخوف
***
و آدى الزمن رحال ... بيسابق الدنيا
عايش و مش هامّه , اكمنها فانية
وانت يا متفرج ... ماسكلهم ساعة
بتدق , و الدقة بتعدى 100 ثانية
.... و عجبى

Friday, July 11, 2008

دفتر ورق


و صحيت من الاحلام لقيت
دفتر ورق و معاه قلم و بقايا بيت
كان يوم حبيبى و انتهى المشوار معاه
أنا كنت اقوى , بس ليه ضعفت و بكيت ؟؟


.... عجبى

Sunday, July 6, 2008

هامش حياة


ياللى عشان هامش حياة جرّحتنى
بتقول بحبك و انت ياما دبحتنى
مش عارفة انت كسبت ايه
لكن اكيــــــــــد ... خسرتنى
و عجبى
..

بكرة


بكرة مالهوش ملامح
فعيونه الجرح فاضح
و محدش فينا عارف
مجروح ده ولا جارح ؟؟

عجبى
..

Thursday, June 26, 2008

ممنوع الإقتراب

عندى مليون كتاب
فى الفرح و فى العذاب
عنوان على كل صفحة
!!!!! ممنوع الإقتراب
.... عجبى

Wednesday, June 25, 2008

مراية




يا مراية جارحة بألف وش و ألف لون
الصدق فعنيها اتخلق ... علشان يخون
كان فيها شىء بيدق ... لكن !!!
دق فوق راسى بجنون

و عجبى..

يا وجع



مالك بتصرخ ليه و تشهق يا وجع ؟؟
اكمن قلبى بعد ما طعنته ... اتوجع
هو الضمير جواك صحى ؟
ولا البكى فـ قلبى اتسمع ؟؟

 عجبى







Friday, June 20, 2008

مركب و دوامة



مركب ... نسيت جواها أحلامى
سلمتها عمرى و هديتها ايامى
وعدتنى ان الموج عمره ما حيطولنى
لكنى قمت لقيت ... دوامة أدامى

و عجبى ...

الحب انتصر


ما انتصرتش يا حبيبى ... لكن الحب انتصر
عشقى كان ليك بيت و مرسى و انت كان حبك سفر
بس قلبى لو بيبكى عاللى آمن بيه معاك
يبقى ده إخلاص لحبه ... اللى بيه الكون كفر
و عجبى ..