يا عمر تايه وسط صوت الموت
أنفاس ملامحك صوتها اعلى سكوت
الارض سارحة و النجوم حرّاس
و اليوم يعدى و السنين بتفوت
***
ده حلم داير بس مش قدك
مليان دواير حزن على خدك
جربت تلمس أوله و تبنيه
عرّاك أمام الكون و بجرئته هدّك
***
والخوف طريقك اللى مش معروف
ضرير و حالف عمره يوم ما يشوف
حملك تقيل نايم على ضهرك
و العمر يجرى بيك لأرض الخوف
***
و آدى الزمن رحال ... بيسابق الدنيا
عايش و مش هامّه , اكمنها فانية
وانت يا متفرج ... ماسكلهم ساعة
بتدق , و الدقة بتعدى 100 ثانية
.... و عجبى
5 comments:
جميل جدا الشعر .. بجد المرة دي تفوقتي علي نفسك .. وماشاء الله واضح انك فاهمة الأوزان كويس .. الاوزان فعلا بتحتاج حد يحسها من غير دراسه ولا حاجه
والمعني كمان رائع جدا .. انتي متأثرة جدا بصلاح جاهين .. باحس في شعرك بنفس العمق والفلسفة اللي في شعره
بالتوفيق دايما
تحياتي
ميرسى اوى يا فارس على رأيك اللى بعتز بيه جدا جدا
انا فعلا بحب عمق و فلسفة جاهين جدا
و بحب الوزن اللى بيمشى عليه
و اكيد اتأثرت بده شوية
بس انا فين و ابداع جاهين فين
ربنا يوعدنا
بجد كلامك فرحنى جدا
و مستنية رأيك ديما
عايزين حاجه فيها امل
بس ده مايمنعش ان الكلام اكتر من رائع
كلام دسم مليان صور وخيال
تحياتى
Post a Comment