ياللى نويت الجرح

ياللى نويت الجرح ... متلومش ع المجروح
لو يوم وجع دمعته علّى ف صراخه النوح
و لو نويت تدبح و رفعت سكينك
الدم لو لطخّك ... متلومش ع المدبوح
!! عجبى

لما الوجع بيزيد

لما الوجع بيزيد على قلبى بحتاجلك

لما السكون يسكن وجدانى بندهلك

أنا اه بعيش و بمثل الفرحة

لكن محستهاش بعدك ولا قبلك

حبيبى فى عيونك

تحديث

بعتذر عن عدم التواجد خلال شهر رمضان

لان وقتى مضغوط جدا

و دخولى على النت اكتر من محدود

اعود لكم بعده بإذن الله

تحياتى للجميع

.............................................................

ضمينى يا أشجار و انسينى فغصونك

قلبى لأوراقك عاشق و بيصونك

دمعى على خدك , دفاه يقيد الكون

علشان بشوف ديماً حبيبى فعيونك

.... وعجبى

يا بحر

يا بحر غنيلى و خد بإيد غربتى

و ارمينى فوق شطك , أصل الرمال صحبتى

دفينى بصخورك و امحى اوام وجعى

و بموجك العالى ارسم خطوط بسمتى

.. و عجبى

ياشمس

ياشمس ياللى أشعتك بتكوى جرح الكون

اكوى جراحى فسكتك خلى آلامى تهون

خدينى و ارمينى فى حضن يحمينى

وصى حبيبى يضمنى و أمّنيه ما يخون

,

.... و عجبى

جنون الغربة

تحديث

........

اعتذر عن تغيبى لفترة

اعود بعدها بإذن الله

و اعتذر لكل من اغفلت تعليقه و لم ادخل مدونته

.

.

فى الدنيا دى ماشيين على اطراف اصابعنا

ننده بعلو الصوت , جنون الغربة يسمعنا

يدور بينا بلاد و بلاد , ياخدنا فحضن اقوى بعاد

و لمّا خلاص نقول راجعين .... مفيش مركب ترجعنا

.... عجبى

الغدر بكانى

جريت من الأحزان و لقتها لحقانى
فاكرة الجراح لكن ... الفرحة سرقانى
جربت يوم اضحك و انسى اللى كان بيّا
القسوة قتلتنى و الغدر بكانى

عجبى

دواير

يا عمر تايه وسط صوت الموت

أنفاس ملامحك صوتها اعلى سكوت

الارض سارحة و النجوم حرّاس

و اليوم يعدى و السنين بتفوت

***

ده حلم داير بس مش قدك

مليان دواير حزن على خدك

جربت تلمس أوله و تبنيه

عرّاك أمام الكون و بجرئته هدّك

***

والخوف طريقك اللى مش معروف

ضرير و حالف عمره يوم ما يشوف

حملك تقيل نايم على ضهرك

و العمر يجرى بيك لأرض الخوف

***

و آدى الزمن رحال ... بيسابق الدنيا

عايش و مش هامّه , اكمنها فانية

وانت يا متفرج ... ماسكلهم ساعة

بتدق , و الدقة بتعدى 100 ثانية

.... و عجبى

دفتر ورق

و صحيت من الاحلام لقيت
دفتر ورق و معاه قلم و بقايا بيت
كان يوم حبيبى و انتهى المشوار معاه
أنا كنت اقوى , بس ليه ضعفت و بكيت ؟؟

.... عجبى

هامش حياة

ياللى عشان هامش حياة جرّحتنى
بتقول بحبك و انت ياما دبحتنى
مش عارفة انت كسبت ايه
لكن اكيــــــــــد ... خسرتنى
و عجبى ..

بكرة

بكرة مالهوش ملامح
فعيونه الجرح فاضح
و محدش فينا عارف
مجروح ده ولا جارح ؟؟

عجبى ..

ممنوع الإقتراب

عندى مليون كتاب

فى الفرح و فى العذاب

عنوان على كل صفحة

!!!!! ممنوع الإقتراب

.... عجبى

مراية

يا مراية جارحة بألف وش و ألف لون
الصدق فعنيها اتخلق ... علشان يخون
كان فيها شىء بيدق ... لكن !!!
دق فوق راسى بجنون

و عجبى..

يا وجع

مالك بتصرخ ليه و تشهق يا وجع ؟؟
اكمن قلبى بعد ما طعنته ... اتوجع
هو الضمير جواك صحى ؟
ولا البكى فـ قلبى اتسمع ؟؟

 عجبى

مركب و دوامة

مركب ... نسيت جواها أحلامى
سلمتها عمرى و هديتها ايامى
وعدتنى ان الموج عمره ما حيطولنى
لكنى قمت لقيت ... دوامة أدامى

و عجبى ...

الحب انتصر

ما انتصرتش يا حبيبى ... لكن الحب انتصر

عشقى كان ليك بيت و مرسى و انت كان حبك سفر

بس قلبى لو بيبكى عاللى آمن بيه معاك

يبقى ده إخلاص لحبه ... اللى بيه الكون كفر

و عجبى ..